Ապրիլի 29-ին Մարտական պատրաստության ակումբը հյուրընկալել էր ՀՀ պաշտպանության նախարարության մամուլի քարտուղար, ռազմական վերլուծաբան Արծրուն Հովհաննիսյանին, ով հանդես եկավ դասախոսությամբ՝ «ՀՀ զինված ուժերի սպառազինությունը» թեմայով:
Արծրուն Հովհաննիսյանը իր խոսքը սկսեց բանակի մարտունակության չափորոշիչների վերաբերյալ հարցով, որը բուռն արձագանք ստացավ լսարանում և առաջացրեց բազմաթիվ հարցեր, որոնք բանախոսի կողմից արժանացան սպառիչ պատասխանների: Այնուհետև պրն. Հովհաննիսյանը թվարկեց այդ չափորոշիչները՝ մեկնաբանելով, թե ՀՀ զինված ուժերը այդ չափորոշիներից որոնց դեպքում են համարվում առաջատար, և թե որոնց դեպքում են առկա թերություններ:
Անդրադառնալով ՀՀ ԶՈՒ սպառազինությանը՝ Արծրուն Հովհաննիսյանը ներկայացրեց, թե ինչպիսի հիմնական զորատեսակներով են համալրված ՀՀ զինված ուժերը՝ այդպիսով ընգծելով ՀՀ պաշտպանական քաղաքականության առանձնահատկությունները: Արծրուն Հովհաննիսյանը ներկաներին ծանոթացրեց նաև ՀՀ ԶՈՒ ընդհանուր կառուցվածքին:
Իր խոսքում բանախոսը համեմատականներ անցկացրեց ՀՀ զինված ուժերի ու Տարածաշրջանի այլ բանակների, ինչպես նաև աշխարհում առավել կայացած համարվող զինված ուժերի միջև՝ ընդգծելով, որ ՀՀ զինված ուժերը իրենց մարտունակությամբ ոչնչով չեն զիջում (առանձին դեպքերում նույնիսկ գերազանցում են) նրանց:
Հանդիպման վերջում բանախոսը պատասխանեց լսարանի հարցերին, որոնք առնչվում էին ՀՀ ռազմարդյունաբերական համալիրին, ՀՀ զինված ուժերի մարտական պատրաստությանը, մարտունակությանը, հարևան երկրների ագրեսիվ քաղաքականությանը և այլն:
Մարտական պատրաստության ակումբը «Աշխարհազոր» երիտասարդական, կրթական հասարակական կազմակերպության նախաձեռնությունն է, որի շրջանակներում հայ երիտասարդները ստանում են կրակային պատրաստության, մարտավարական պատրաստության, առաջին օգնության հմտություններ, ինչպես նաև առաջատար մասնագետների կողմից իրազեկվում են ազգային և տարածաշրջանային անվտանգության հիմնահարցերի մասին: Նախաձեռնությանն աջակցում են ՀՀ պաշտպանության նախարարությունը, Ամերիկայի հայկական համագումարի տարածաշրջանային գրասենյակը, Մովսես Գորգիսյանի անվան Սթրայքբոլի հայկական ֆեդերացիան, «Լեգեոն» փեյնթբոլի ակումբը, Ռազմական թաեքվանդոյի ֆեդերացիան, Հայաստանի ազգային սկաուտական կազմակերպությունը (ՀԱՍԿ), Հայ բարեգործական ընդհանուր միության (ՀԲԸՄ) Երևանի սկաուտական կազմակերպությունը, Հայկական կարմիր խաչի ընկերությունը: